ठामपा पत्रकार कक्षात दोन अद्ययावत संगणक प्रदान
ठाणे, प्रतिनिधी
ठाणे विधानसभा मतदारसंघातील शाळा आणि शासकीय कार्यालये डिजिटल करण्याच्या उपक्रमासोबतच लोकशाहीचा चौथा स्तंभ असलेल्या पत्रकारितेलाही आधुनिक तंत्रज्ञानाची जोड मिळावी, या उद्देशाने आमदार संजय केळकर यांनी ठाणे शहर दैनिक पत्रकार संघाच्या ठामपा पत्रकार कक्षाला दोन अद्ययावत संगणक भेट दिले. यापूर्वीही पत्रकार संघाच्या मागणीनुसार सहा संगणक उपलब्ध करून दिल्याचे सांगत, पत्रकारांसाठी उत्तन येथील रामभाऊ म्हाळगी प्रबोधिनी आणि केशवसृष्टी येथे अभ्यासदौरा आयोजित करणार असल्याची घोषणाही आ. केळकर यांनी केली.
ठाणे शहर दैनिक पत्रकार संघाच्या पत्रकार कक्षात गुरुवारी, २९ ऑक्टोबर रोजी या संगणकांचे लोकार्पण करण्यात आले. पत्रकारितेच्या कामकाजात आधुनिक तंत्रज्ञानाचा वापर वाढावा, माहितीचे संकलन आणि बातम्यांची निर्मिती अधिक सुलभ व्हावी, यासाठी हे संगणक उपयुक्त ठरतील, अशी अपेक्षा यावेळी व्यक्त करण्यात आली.
ठाणे शहर विधानसभा मतदारसंघातील शाळा तसेच विविध शासकीय कार्यालयांना संगणक उपलब्ध करून देत आ. केळकर यांनी मतदार संघाचे डिजिटल सक्षमीकरण केले आहे. याच धर्तीवर पत्रकारितेच्या क्षेत्रालाही अद्ययावत सुविधांची जोड मिळावी, या भूमिकेतून ठाणे महापालिका मुख्यालयातील पत्रकार कक्षासाठी संगणक उपलब्ध करून दिल्याचे आ. संजय केळकर यांनी सांगितले. यावेळी पत्रकारांना केवळ तांत्रिक सुविधा उपलब्ध करून देण्यापुरतेच मर्यादित न राहता, त्यांना अभ्यास आणि माहितीच्या माध्यमातून अधिक समृद्ध करण्यासाठी उत्तन येथील रामभाऊ म्हाळगी प्रबोधिनी तसेच केशवसृष्टी येथे अभ्यासदौऱ्याचे आयोजन करण्यात येणार असल्याचेही आ. केळकर यांनी स्पष्ट केले. केशवसृष्टी मध्ये पत्रकारांना प्रशिक्षण देण्याबाबत संघाचे अध्यक्ष दिलीप शिंदे यांनी आपल्या भाषणात सूचना केली होती.
या लोकार्पण सोहळ्याला भाजपचे नगरसेवक सुरेश कांबळे, कृष्णा भुजबळ, विशाल वाघ आणि ठाणे शहर दैनिक पत्रकार संघाचे अध्यक्ष दिलीप शिंदे, कार्याध्यक्ष दीपक शेलार, उपाध्यक्ष निलेश मंडलिक, सरचिटणीस राजीव डाके, खजिनदार राजेश शेटकर, सदस्य अमर राजभर, गजानन हरिमकर, सारिका साळुंखे आदीसह अनेक पत्रकार बांधव उपस्थित होते.
