ठाणे : नागरिकांच्या सदृढ आरोग्यासाठी तसेच मोबाईलच्या आहारी गेलेल्या मुलांना विविध खेळ, कला आणि सांस्कृतिक उपक्रमांची गोडी लागावी या उद्देशाने “आनंद पथ – रस्ता आरोग्याचा” या अभिनव उपक्रमाचे आयोजन रविवारी मोठ्या उत्साहात करण्यात आले. नगरसेवक राजेश मोरे आणि माजी नगरसेविका रुचिता राजेश मोरे यांच्या वतीने या उपक्रमाचे आयोजन करण्यात आले होते.
ठाणे महापालिका, ठाणे पोलीस आयुक्तालय तसेच आयोजकांच्या संकल्पनेतून सुरू झालेल्या या उपक्रमाचे यंदाचे पाचवे वर्ष असून ठाणे महापालिका मुख्यालयासमोरील रस्त्यावर नागरिकांनी मोठ्या उत्साहात सहभाग घेतला. “चला आनंदपथावर… आपण सारे नाचू-गाऊ, योगा आणि आपले खेळ खेळूया” या संकल्पनेखाली विविध खेळ, कला आणि सांस्कृतिक कार्यक्रम सादर करण्यात आले.
या उपक्रमामध्ये योग, ड्रम सर्कल, जिम्नॅस्टिक, पंजा लढविणे, शिवकालीन युद्धकला, स्केचिंग, दोरउड्या, मल्लखांब, क्रॉस फिट, नृत्य,कराओके आदी विविध प्रकारांचे सादरीकरण करण्यात आले. तसेच येऊर गावातील तरुणांनी भोवरा, लगोरी आणि लेझीम सादर करून पारंपरिक खेळांची झलक दाखवली. नागरिकांनी देखील विविध खेळांमध्ये सहभाग घेत आनंद लुटला.
या उपक्रमाचे उद्घाटन वाहतूक शाखेचे पोलीस उपायुक्त पंकज शिरसाट यांच्या हस्ते करण्यात आले. यावेळी नगरसेवक राजेश मोरे, माजी नगरसेविका रुचिता राजेश मोरे, प्रा. एकनाथ पवळे आदी मान्यवर उपस्थित होते.
उन्हाळ्याच्या सुट्टीत कुटुंबासमवेत आनंददायी वेळ घालवता यावा तसेच नागरिकांनी मोबाईलपासून दूर राहून आरोग्यदायी उपक्रमांकडे वळावे हा या उपक्रमामागील मुख्य उद्देश असल्याचे राजेश मोरे यांनी सांगितले.
दरम्यान, हा उपक्रम रविवार दि. २४ मे रोजी सकाळी ६.३० ते ८.३० या वेळेत पुन्हा आयोजित करण्यात येणार असून ठाणेकरांनी मोठ्या संख्येने सहभागी व्हावे, असे आवाहन नगरसेवक राजेश मोरे यांनी केले आहे. तसेच या उपक्रमात सहभागी होऊ इच्छिणाऱ्या संस्थांनी समन्वयक प्रा. एकनाथ पवळे (९८२१७८६५४३) यांच्याशी संपर्क साधावा, असेही त्यांनी सांगितले.
