ठाणे :
जी गोष्ट पॅशन म्हणून केली जाते, तिचे परिणाम उत्तम आरोग्य आणि सकारात्मक ऊर्जा यांमध्ये दिसून येतात. एक व्यक्ती तंदुरुस्त राहिल्याने त्याचा परिणाम अनेकांवर होतो, प्रेरणादायी ठरतो. फिटनेसचा संदेश सर्वसामान्यांपर्यंत पोहोचणे आवश्यक आहे. सायकलिंग हा इको-फ्रेंडली, सर्वांना सहज उपलब्ध आणि प्रभावी व्यायामाचा स्रोत आहे. आपण शरीराने जितके तंदुरुस्त राहू, तितके मनही तंदुरुस्त राहते आणि विचार स्पष्ट व सक्षम होतात असे मत ठाण्याचे सहपोलीस आयुक्त डॉ. ज्ञानेश्वर चव्हाण यांनी व्यक्त केले.
आम्ही Cycle प्रेमी फाऊंडेशनतर्फे आजवरच्या १३५९ राईड आणि १,०४,७६२ किमी पेक्षा अधिक प्रवास करणाऱ्या सोलापूरच्या प्रकाश गिरी यांचा सोमवारी ठाणे पोलीस आयुक्तालयात डॉ. चव्हाण यांच्या हस्ते विशेष सन्मानपत्र देऊन गौरव करण्यात आला. ६१ व्या वर्षी गिरी यांनी दाखवलेली शिस्तबद्ध आणि प्रेरणादायी सायकलिंग वाटचाल याचे डॉ. चव्हाण यांनी विशेष कौतुक केले. गिरी हे मागील तीन वर्षांपासून दररोज पहाटे १०० किमीची नियमित सायकलिंग करतात सायकलिंगमुळे ८९ किलोवरून ६३ किलोपर्यंत केलेला अतुलनीय बदल हा फिटनेस जगतातील एक प्रेरणादायी आदर्श आहे. रात्री २.४० वा. झोपेतून उठल्यानंतर पहाटे ३.४० वा. ते सायकलिंगला सुरूवात करतात. डॉ. चव्हाण पुढे म्हणाले की, फिटनेसचे महत्त्व आजच्या काळात झपाट्याने वाढत आहे. त्यात सायकलिंग, व्यायामशाळा, पोहणे अशा विविध प्रकारच्या शारीरिक क्रियांचा समावेश होतो. यातही सध्या सायकलिंगची लोकप्रियता विशेष वाढलेली दिसते. अर्थात, सायकलिंगसाठी स्वतंत्र ट्रॅक सर्व ठिकाणी उपलब्ध नाही, ही एक अडचण आहे. परंतु त्या मर्यादांमध्येही अनेक सायकलप्रेमी सुरक्षिततेची पूर्ण काळजी घेत सायकलिंग करतात आणि इतरांनाही त्यासाठी प्रेरित करतात, हे अत्यंत कौतुकास्पद आहे. ६१ वर्षीय प्रकाश गिरी यांनी साठी ओलांडल्यानंतर तब्बल एक लाख किलोमीटरपेक्षा जास्त सायकलिंग केले आहे. त्यामुळे फिटनेससाठी कोणतेही वय अडथळा ठरत नाही, हे त्यांनी प्रत्यक्ष कृतीतून सिद्ध केले आहे. ज्येष्ठ सायकलपटू प्रकाश गिरी म्हणाले की, आम्ही सायकल प्रेमी फाऊंडेशनने केलेल्या सत्काराबद्दल मनःपूर्वक आभार मानतो. यावेळी संस्थापिका अध्यक्षा प्रज्ञा म्हात्रे, सचिव दीपेश दळवी, सायकलपटू काशिनाथ आणि मीनाक्षी गायकवाड, सुप्रिया पुरी, अनिकेत गद्रे, पत्रकार राजू काळे आदी उपस्थित होते.
